नव्या युगाची हाक
अम्हाला झेप आमुची यशाकडे ।
धमक कुणाची अडवायाची
गती आमुची पुढे पुढे ॥धृ॥
नरसिंहाचे वंशज
आम्ही रिपुरक्ताचे शिंपू सडे ।
बलवत्तर बाहूंवर
तोलू आपत्तींचे घोर कडे ॥१॥
भीषण झंझा मोह निशा
वा करू दे नर्तन चोहिकडे ।
आकाशाची कुर्हाड
पडु दे तरिही राहू अढळ खडे ॥२॥
विजयश्रीला जिंकुन
आणू उन्मत्तांना चारू खडे ।
खेचुन आणू स्वर्ग
धरेवर आम्ही छातीचे निधडे ॥३॥
मृत्यूलाही तुडवून
जाऊ ध्येयपथावर नित्य पुढे ।
व्यक्त्तिव्यक्तिचे
हृदय पेटवू करी घेउनी दीप्त चुडे ॥४॥
स्वदेश उठता
दिशादिशांतुन कोण करंटा देत दडी ।
देशभक्तिविण जीवन
म्हणजे प्राणावाचुन व्यर्थ कुडी ॥५॥
देशासाठी जन्म आमुचा
भूमातेस्तव देह पडे ।
मरून आम्ही जगास देऊ
अमरत्वाचे नवे धडे ॥६॥
कोणत्याही टिप्पण्या नाहीत:
टिप्पणी पोस्ट करा