गाथा भारत विजयाची

जय हिंदुभू असे वेळ ही । आत्मपरीक्षण करण्याची ।
उठा आज घ्या शपथ आपुल्या । देशासाठी जगण्याची ।
देशासाठी जगण्याची । देशासाठी मरण्याची ॥धृ॥ 

मनोनिग्रहे करी असावी । निर्माणाची शक्ती नवी ।
पावलातल्या तरूण गतीला । मातृभक्तीची दिशा हवी ।
शब्दांनाही धार येऊ दे । देशाच्या अभिमानाची ॥१॥ 

क्रूर गिधाडे परसत्तेची । घात कराया टपलेली ।
सरली आता जरी न यादवी । जीवित आशा मग कुठली ।
आज परीक्षाखरी आपुल्या । संघटनेच्या शक्तीची ॥२॥ 

लोप जाहला जय नीतिचा । अनर्थ करता राज्य इथे ।
घरी स्वतःच्या परकेपण ये । मग देशाला स्थान कुठे ।
वेळ पातली भगवंताचे । चक्र सुदर्शन फिरण्याची ॥३॥ 

मनामनातील ईश जागवू । धर्मस्थापना पुन्हा करू ।
हिंदुत्वाच्या जय घोषाने । अंबर अवघे पुन्हा भरू ।
उभवू नभांतरी भगवा गाऊ । गाथा भारत विजयाची ॥४॥